فيروس كورونا... شنو خاصك ضروري تعرف عليه؟!
الغرض من هذا الموضوع توعوي بدرجة كبيرة، بحيث في ظل هاد الأزمة لي كيعيشها العالم بسبب انتشار هاد الفيروس، وكمية التخوف لي يقدر يحس بيها الإنسان تُجاه هاد الأمور كلها - ولي هو تخوف مفهوم تماماً -، كيخص ضروري الإنسان - بعيداً على الطرولات والضحك لي كثر بزاف - أنَّه يكون عارف شوية على هاد الفيروس والأهم من ذلك كيفاش يقدر يحصن راسو ضد هاد العدوى، فا بلا ما نطول عليكم:
1- شناهو هاد الفيروس؟
فيروسات كورونا أو الفيروسات التاجية* هي عبارة عن سلالة من الفيروسات لي بدورها كتنتامي ليها 4 الأنواع أهمها - لي كيهمنا فهاد المقال - هو النوع لي كيتسما "بيتا كورونا فايروس" Betacoronavirus، لأن هاد الفيروس لي كاين حالياً كينتامي لهاد النوع بالإضافة لفيروسات أخرى أشهرها:
- SARS-CoV المتلازمة التنفسية الحادة الوخيمة:
لي بان فالصين سنة 2002 ونتاشر فمجموعة من الدول خَلَّف 8096 إصابة وقتل 774 شخص.
- MERS-CoV متلازمة الشرق الأوسط التنفسية:
بان فالسعودية سنة 2012، ونتاشر كذلك فمجموعة من الدول تصاب بيه 2494 شخص ومات 912.
- COVID-19
هو الفيروس لي بان مؤخراً فالصين، بخصوص الحالات لي تصابو والحالات لي مع الأسف ماتوا تقدرو تشوفوهم على هاد الخارطة (الجميل فيها أنَّها دائماً كيتم التحديث ديالها على مدار الساعة) من إعداد مجموعة من الباحثين من جامعة جون هوبكِنز:
2- علاش هاد الفيروس خالق ضجة كبيرة؟ وكيفاش كيتم التشخيص ديالو؟
السبب الرئيسي أنَّ هاد السلاسة ديال هاد الفيروس COVID-19 أول مرة غادي يبان ضونك أول مرة غادي يتعاملو معاه العلماء، بالإضافة إلى أنَّه كينتاشر بوثيرة كبيرة وخلف مجموعة من الوفيات - مع الأسف مازال العدد كيتزاد.
وبما أنَّه جديد فضروري خاص العلماء وقت باش يلقاو شي علاج، ولي مازال لحد الساعة ما كين حتى شي حاجة أكيدة، لي كاين حالياً هو فقط معالجة الأعراض كل على حدة، وكذلك هناك دراسات تشير إلى فعالية دواء الكلوروكين ( دواء الملاريا) على عدة حالات تمت تجربته عليها في انتظار توسيع هذه الدراسات.
أما بخصوص الفيروس، فترة الكمون ديالو كتكون بين 2 و 14 يوم، بمعنى تقدر تبقى 14 يوم ونتا حامل للفيروس بدون أي اعراض.
والتشخيص الأولي كيكون فحالة ظهور أعراض المرض عند أحد الأشخاص لي كان فاتصال مباشر مع أحد المصابين أو أي شخص قادم من مناطق موبوءة، و لكن من أجل تأكيد التشخيص ضروري من تحليلة لإفرازات الجهاز التنفسي ( التنخيمة مثلا).
كما أنَّ الفيروس يمكن له البقاء على قيد الحياة خارج الجسم لفترة تتراوح بين دقائق و 9 أيام، وهدشي كيرجع للظروف المناخية بالخارج فمثلا يمكن للفيروس يبقى أيام في مكان بارد ورطب بينما يموت بسرعة في مكان جاف و ساخن.
3- كيفاش كينتاقل هاد الفيروس؟
من المُفترض أنَّ هاد الفيروس أوَّل ما بان فالحيوانات وانتقل للإنسان، ثم بدا كينتاقل من إنسان لإنسان إمّا:
- عن طريق الاتصال المباشر ( شي حد مصاب وعطس فيديه وسلمتي عليه من بعد قستي فمك ولا نيفك)
- عن طريق الرداد المتطاير عند عطاس المصاب بالفيروس، لذلك دائما ينصح بمسافة أمان لا تقل عن مترين عن الشخص المصاب او المحتمل الإصابة.
- بعض الفيروسات كيقدرو ينتاشرو فالهواء ويقدرو يبقاو فيه لمدة معينة على شكل قطرات صغيرة بزاف (العلماء مازال كعما متأكدين واش فيروس كورونا 2019 من هاد النوع ولكن يُنصح باتخاذ الاحتياطات).
4- شناهوما الأعراض ديال هاد الفيروس؟
الأعراض كتشبه الى حد كبير أعراض الإنفلونزا:
- ارتفاع درجة الحرارة
- السعال
- آلام في الرأس والعضلات
- التهاب الحنجرة
- ضيق في التنفس بالإضافة لآلام في الصدر.
5- كيفاش نقدر نحمي راسي؟
أول حاجة باش الإنسان ما يكونش عندو داك الخوف المُفرط، هاد الفيروس كيقتل %2 فقط من المصابين، بسبب القصور فالجهاز التنفسي أو الكلوي، خصوصاً عند الناس المسنين و لي عندهم أمراض مزمنة أو مشاكل فالجهاز المناعي.
لذلك من بين الأمور لي يقدر الإنسان يحمي بيهم نفسو:
شرب المياه بكثرة و تناول المشروبات الساخنة، الابتعاد عن التدخين، التغدية بشكل جيد ومتوازن، النوم الجيد، ممارسة الرياضة.
الابتعاد عن الأمكان المزدحمة، غسل اليدين بالمعقم باستمرار وفكل مرة يبغي الإنسان يقيس وجهو.
أما بالنسبة لشي شخص إلى - لا قدر الله - شك لي يقدر يكون تصاب بهاد الفيروس، فضروري من وضع الكمامات واستخدام المناديل الصحية عند السعال او العطاس، الإبتعاد عن الأماكن المزدحمة، و كذلك تفادي الاقتراب من أي شخص آخر، وأهم حاجة ضروري من الاتصال بالرقم الأخضر المخصص لذلك و لا ينصح بالذهاب مباشرة عند الطبيب أو المستعجلات الطبية باش ما يساهمش فانتشار هاد الفيروس.
* تسمات بهاد السمية (التاجية) حيتاش هاد الفيروس فاش كنشوفوه بالمجهر كيبان فحال إلى كايت شي (تاج) فوق منو.
تعليقات